Mgogoro wa madiwani Bukoba waipasua CCM

Aliyekuwa Mkurugenzi wa Manispaa ya Bukoba, Hamis Kaputa ambaye uhamisho wake unahusishwa na mgogoro wa madiwani akitoa ufafanuzi katika Baraza la Madiwani mjini Bukoba. Katikati ni Meya wa Manispaa ya Bukoba, Dk Anatory Amani na Naibu Meya Alexander Ngalinda.   Picha na Phinias Bashaya  

Na Phinias Bashaya, Mwananchi  (email the author)

Posted  Jumatano,Agosti21  2013  saa 13:38 PM

Kwa ufupi

Mgogoro huo wa kisiasa ni  wa muda mrefu. Kwa upande mmoja unamhusisha Menya, Dk Anatory Amani na badhi ya madiwani na upande wa pili yupo Mbunge, Balozi Khamis Kagasheni na kundi jingine la madiwani. Wote wanatuhumiana kwa mambo mbalimbali, lakini nyuma ya pazia inadaiwa ni mbio za uchaguzi mwaka 2015

Keshokutwa hatima ya madiwani wanane wa Chama Cha Mapinduzi (CCM)  waliotimuliwa itajulikana mjini Dodoma.

Mgogoro huu ulianza kama mchicha sasa umekua na kugeuka mbuyu. Ulianza kama tishio la chama hicho mkoani Kagera pekee na Baraza la Madiwani la manispaa ya Bukoba, leo umekomaa hadi unajadiliwa na Kamati Kuu ya CCM inayokutana Ijumaa.

Hatua ya CCM mkoa kuwatimua madiwani hao ni jaribio la kwanza kwa chama ngazi ya mkoa kufikia uamuzi mgumu tangu ilipotangazwa sera yake ya kujivua gamba.

Mgogoro huo dhidi ya Meya Dk Anatory Amani si habari mpya, umevuma kwa zaidi ya mwaka mmoja. Nyuma yake kuna kivuli cha mbunge wa Bukoba, mjini Balozi Khamis Kagasheki anayeunga mkono tuhuma za ufisadi dhidi ya meya.

Upepo wa kisiasa usingebadilika ghafla hivi, kama Mwenyekiti wa CCM, Rais Jakaya Kikwete asingefanya ziara mkoani hapa hivi karibuni na kushauri tofauti zilizopo baina ya makundi hayo zimalizwe.

Rais Kikwete wakati akihitimisha ziara yake alisema lazima soko jipya lijengwe, mpango unaopingwa kwa nguvu zote na madiwani waliotimuliwa.

Kauli hiyo ilionekana kutoa ushindi kwa upande wa pili na hivyo madiwani hao wakajipanga kulipa kisasi.

Kwa vyovyote vile kundi hili haliwezi kukubali mradi wa kujenga soko jipya kwani wengi wao wanamiliki idadi kubwa ya vibanda sokoni ambavyo huvikodisha kwa wafanyabiashara wengine.

Kabla Rais Kikwete hajatua Dar es Salaam, madiwani waliandika barua ya kumtaka Mkurugenzi wa Manispaa kuitisha kikao cha kupiga kura ya kutokuwa na imani na Meya. Kauli ya Kikwete ilionekana kuwa tofauti na matarajio yao.

Madiwani walitaka kumwonyesha Mwenyekiti wao kuwa upo wakati sikio linaweza kuzidi kichwa. Maelekezo yaliyotolewa na Mwenyekiti wao jinsi ya kumaliza mgogoro huo yalipuuzwa. Katika hatua hii pia walifanikiwa kumnasa Diwani wa Kata ya Bakoba, Felician Bigambo (Cuf).

Kabla ya kuhamia kundi hili, Bigambo alikuwa mstari wa mbele kutetea miradi waliyoibua. Alitoa ushahidi mbele ya Tume ya Abbas Kandoro jinsi madiwani walivyoshiriki hatua zote za vikao vya uamuzi. Ghafla alijiunga na kundi la madiwani wa CCM ili awasaidie kulipa kisasi dhidi ya matamshi ya Rais Kikwete.

Mwanzoni mwa mgogoro huu,Taasisi ya Kuzuia na Kupambana na Rushwa (Takukuru) Mkoa wa Kagera ilithibitisha kuwahoji baadhi ya madiwani waliotimuliwa kwa tuhuma ya kupokea rushwa. Tangu wakati huo ukweli wa tuhuma hizo umebaki kuwa siri ya Takukuru

Vioja vya Madiwani

Madai ya madiwani hao yameambatana na vituko kadhaa zikiwamo tuhuma za kunyang’anywa simu na kufungiwa eneo moja ili wasipatikane wakati wa vikao vya Baraza. Ni mpango wa kumkomoa Meya wao, ili kukwamisha vikao baada ya akidi kupungua.

Hii ni dhambi inayowatafuna, kwani madiwani wale wale waliwekwa ‘mateka’ wilayani Chato ili kufanikisha mpango wa kumng’oa meya wa zamani, Samwel Ruhangisa kwa hofu kuwa wangerubuniwa. Diwani huyo wa zamani amejiunga na kundi la kumpinga meya wa sasa.

Kwa mwaka mzima madiwani wamegomea vikao hata walipofika ilikuwa kwa ajili ya kushinikiza ajenda yao ya kumng’oa Meya. Waligoma hata kujadili bajeti ya Manispaa ambayo ndiyo msingi wa kufanikisha shughuli za maendeleo ya wananchi wanaowawakilisha.

Miezi michache iliyopita madiwani hao walikwenda Dodoma kupeleka mashtaka yao kwa Waziri Mkuu dhidi ya Meya wao. Waliondoka kwa mbwembwe, ingawa walirejea kwa mafungu baada ya lengo lao kukwama.

Ni madiwani walewale walioibua madai kuwa hawakuwa na imani na Tume iliyoundwa na Waziri Mkuu kuchunguza tuhuma dhidi ya meya, wakidai kiongozi wa Tume hiyo  Abbas Kandoro alionekana akizungumza na mtuhumiwa.

Wakurugenzi wawili wang’oka

Katika mgogoro huu hata watumishi wa Manispaa ya Bukoba hawako salama. Wako makini kwa kauli na vitendo ili wasituhumiwe kuunga mkono moja ya makundi yanayopingana.

Tayari wakurugenzi wawili wameng’olewa kwa sababu za kisiasa zaidi kuliko utendaji wao wa kazi. Mkurugenzi aliyekuwepo wakati mgogoro unaanza, Hamis Kaputa alihamishwa ghafla baada ya moja ya pande zenye mgogoro kupoteza imani naye.

 Mkurugenzi aliyechukua nafasi yake, Trazias Kagenzi akitokea wilaya ya Arumeru, mkoani Arusha naye alikaa majuma mawili na baadaye kuondolewa ili kuridhisha moja ya upande wenye mgogoro.

Kilichomponza Mkurugenzi huyo ni kuwa baada ya uchunguzi wa madiwani ilionekana Mkurugenzi mpya alikuwa amesoma darasa moja na Meya, Dk Amani na kujenga hisia kuwa utendaji wake ungependelea upande mmoja.

Sasa kuna Mkurugenzi mpya Limbakisi Shimwela ambaye hofu ya kuogopa makundi yenye mgogoro inasomeka vyema usoni mwake. Hataki kuzungumza lolote kuhusu miradi ya Manispaa hadi hapo hali ya hewa itakapotulia.

Dar es Salaam. Polisi Makao Makuu Kitengo cha Makosa ya Jinai Rasimali Watu, juzi ilimhoji Amir Mkuu wa Jumuiya ya Taasisi za Kiislamu, Sheikh Mussa Kundecha kwa kile walichodai kuwa mtu huyo ni rafiki mkubwa wa Sheikh Kondo Bungo anayetafutwa polisi.

Taarifa kutoka kwenye vyanzo vya polisi Makao Makuu zilieleza kuwa Bungo anatafutwa na polisi kwa kile walichodai alitoa maneno ya uchochezi katika Mkutano wa Waislamu uliofanyika Viwanja vya Mwembeyanga wilayani Temeke, mwishoni mwa wiki iliyopita.

Kamishna Msaidizi wa Jeshi la Polisi, Advocate Nyombi, kutoka Kitengo cha Upelelezi Makao Makuu alipotafutwa jana kuzungumzia suala hilo, simu yake ilikuwa haipatikani.

Chanzo chetu kilidokezwa kuwa baada ya mkutano huo ambao pia ulihudhuriwa na Kamanda wa Polisi Mkoa wa Temeke, Engelbert Kiondo, Polisi walipanga kumkamata Bungo kwa wakati maalumu na siyo eneo lile ili kuepusha vurugu ambazo zingeweza kutokea endapo angetiwa nguvuni.

“Kundecha aliitwa jana (juzi) na kuhojiwa kwa saa kadhaa na kumtaka amlete Bungo ambaye ni mtu wake wa karibu, “ alisema mtoa habari huyo kuongeza kuwa: “Asipofanya hivyo kwa muda aliopangiwa basi atakamatwa yeye hadi hapo atakapo patikana Bungo.”

Katika hatua nyingine, Polisi Kanda Maalumu inamshikilia Profesa wa Chuo Kikuu cha Dar es Salaa m Kitengo cha Utafiti wa Mimea kwa tuhuma za kumjeruhi kwa risasi fundi ujenzi, Fadhili Mkachino.

Kamanda wa Polisi Kanda Maalumu ya Dar es Salaam, Kamishna Suleiman Kova alisema jana kuwa tukio hilo lilitokea juzi saa 10 alasiri maeneo ya SalaSala Benako wilayani Kinondoni.

Alisema Mkachino akiwa na mafundi wenzake wakijenga nyumba moja ya Khadija, ndipo profesa huyo alitokea na kuwataka kusisitisha mpango huo mara moja kwa kile alichodai ni eneo lake.

“Kabla ya mafundi hao hawajafanya chochote ghafla Profesa huyo alitoa bastola na kumpiga risasi mbili tumboni Mkachino ambaye alikuwa kiongozi wa mafundi hao na kumsababishia maumivu makali,” alisema Kamishna Kova.

Kova alisema kitendo cha kumpiga risasi mtu ni kosa la jinai na kwamba ni jambo lisilokubalika katika jamii. Alitoa wito kwa wenye silaha kuwa wavumilivu wakati wote.

souce: Mwananchi