CAG aagizwa kukagua matumizi ya Sh13 bilioni mkutano wa ADB

Mwenyekiti wa Kamati ya Bunge ya Hesabu za Serikali Zitto Kabwe akisisitiza jambo wakati wajumbe wa kamati hiyo walipofanya kikao na watendaji wa Wizara ya Fedha, jijini Dar es Salaam jana. Kulia ni Katibu wa kamati hiyo, Michael Kadebe. Picha na Michael Jamson 

Na Patricia Kimelemeta na Raymond Kaminyoge  (email the author)

Posted  Jumatatu,Agosti19  2013  saa 20:11 PM

Kwa ufupi

Agizo hilo limekuja baada ya Kamati ya Bunge ya Hesabu za Serikali Kuu, kushtushwa na matumizi makubwa.

Dar es Salaam. Kamati ya Kudumu ya Hesabu za Serikali Kuu (PAC), imeiagiza ofisi ya Mdhibiti na Mkaguzi wa Hesabu za Serikali (CAG) kufanya ukaguzi maalumu wa matumizi ya Sh13 bilioni, katika Mkutano wa Benki ya Maendeleo Afrika (ADB) uliofanyika Mei mwaka 2012.

Uamuzi huo umekuja baada ya kubainika kwa matumizi mabaya ya fedha hizo, yaliyofanywa na Hazina kwa ajili ya ununuzi wa samani za ofisini na kompyuta ndogo 200.

Mwenyekiti wa kamati hiyo, Zitto Kabwe alisema mbali na vituo hivyo, Hazina pia imenunua, seti za televisheni za ukutani, mashine za kuchapishia karatasi, viti na makochi ya sebuleni.

Alisema ingawa vifaa hivyo vimenunuliwa kwa fedha za Serikali, baadhi yake vimeachwa katika ukumbi wa Kituo cha Mikutano cha Kimataifa cha Arusha, bila ya kuwapo kwa makabidhiano ya kisheria.

“Kamati imepata mashaka kuhusu matumizi ya Sh13 bilioni katika mkutano wa ADB, jambo lililotufanya tumuombe CAG kufanya ukaguzi maalumu wa matumizi ya fedha hizi za Serikali,” alisema Zitto.

Alisema fedha hizo zilitumika bila ya kupitishwa kwenye bajeti ya Serikali kitengo kinachotia shaka kuhusu uhalali wa matumizi yake. Alisema mkutano huo ulifanyika kwa siku chache, lakini kiasi cha fedha kilichotumika ni kikubwa.

“Ili tuweze kujiridhisha na matumizi ya fedha za walipa kodi, tunapaswa kufanya ukaguzi maalumu utakaobaini uhalali wa matumizi yake na sababu za Hazina kuziacha samani hizo kwenye kituo kile,” alisisitiza.

Hata hivyo, Naibu Katibu Mkuu wa Hazina, Elizabeth Nyambibo, alisema fedha hizo zilitolewa kutoka katika mafungu mbalimbali ya bajeti ya wizara hiyo ili kufanikisha mkutano huo.

Alisema hata hivyo fedha hizo hazikuingizwa katika bajeti kuu.

Alisema, kutokana na hali hiyo, samani hizo zilikabidhiwa kwa Katibu Mkuu wa Wizara ya Mambo ya Nje na Ushirikiano wa Kimataifa ili aweze kuzihifadhi na kuzisimamia.

“Kituo cha AICC kinasimamiwa na Wizara ya Mambo ya Nje na Ushirikiano wa Kimataifa, ndio maana tutamkabidhi Katibu Mkuu wa wizara hiyo ili aweze kusimamia samani hizo, licha ya nyingine kuziondoa,” alisema Nyambibo.

Wakati huohuo, kampuni 900 zimeshindwa kurudisha mkopo wa Sh391 bilioni zilizotolewa na Serikali ya Japan kwa ajili ya wajasiriamali wa Tanzania. Serikali ya Japan ilitoa Sh391 bilioni kwa Serikali ya Tanzania ili ziweze kuwasaidia wajasiriamali nchini, lakini fedha hizo zilikopwa na baadhi ya kampuni na zingine zimeshindwa kurudisha.

 Kwa mujibu wa Kabwe, fedha hizo zilikopwa katika kipindi cha mwaka 1987 hadi 2004.

source: Mwananchi