Bavicha Mbeya wamvaa Naibu Spika kwa vurugu

Na Lauden Mwambona, Mwananchi

Posted  Jumapili,Septemba8  2013  saa 1:2 AM

Kwa ufupi

Mwenyekiti wa Bavicha mkoani humo, Joseph Kasambala alisema tukio hilo limewashtua wapigakura wa mbunge huyo, wanachama wa Chadema na wananchi wa mkoa huo kwa jumla.

Mbeya. Baraza la Vijana wa Chadema (Bavicha) mkoani Mbeya, limelaani tukio la vurugu lilitokea katika Ukumbi wa Bunge mjini Dodoma, ambapo askari wa Bunge walimburuta na kumjeruhi Mbunge wa Mbeya Mjini, Joseph Mbilinyi maarufu kwa jina la Sugu wakati wakimtoa nje ya ukumbi huo.

Mwenyekiti wa Bavicha mkoani humo, Joseph Kasambala alisema tukio hilo limewashtua wapigakura wa mbunge huyo, wanachama wa Chadema na wananchi wa mkoa huo kwa jumla.

Kasambala alidai kuwa chanzo cha vurugu hizo ni Naibu Spika wa Bunge, Job Ndugai kwa kutotaka kumpa nafasi Kiongozi wa Kambi Rasmi ya Upinzani Bungeni, Freeman Mbowe alipoomba mwongozo ili azungumze aliyokuwa nayo.

“Bavicha inalaani tukio zima, lakini pia inamtaka Naibu Spika wa Bunge, Job Ndugai aache tabia yake ya kulivuruga Bunge kwa kutozingatia kanuni za uendeshaji wa shughuli za Bunge,’’alisema.

Wakati huohuo, wakazi jijini humo, juzi walionekana wakiwa katika vikundi wakijadili tukio hilo lililotokea bungeni huku wengine wakisema limeidhalilisha nchi.

Mmoja wa walioshiriki katika mijadala hiyo eneo la Mwanjelwa,Damasi Mwalyego wa Kabwe alisema kuwa tukio hilo ni la kwanza katika historia ya Tanzania.

Alhamisi iliyopita, vurugu kubwa zilitokea bungeni baada ya Naibu Spika wa Bunge, kuwaamuru askari wote waliokuwa bungeni kumtoa nje Mbowe alipokataa kutekeleza amri ya naibu spika huyo.

Askari waliingia na walipotaka kumtoa, wabunge wa upinzani waliamua kuwazuia jambo ambalo lilisababisha vurugu na kusababisha Sugu kubebwa msobemsobe.

source: Mwananchi