JWTZ: Kikosi chetu DRC ni cha kulinda amani, si kupigana na Rwanda

Msemaji wa Jeshi la Wananchi Tanzania, Meja Eric Komba akizungumza na waandishi wa habari jana jijini Dar es Salaam kuhusiana na ushiriki wa Tanzania katika Operesheni ya Ulinzi wa Amani katika nchi ya Demokrasia ya Kongo (DRC). Kulia ni Mkurugenzi wa Idara ya Habari Maelezo, Assa Mwambene. Picha na Aika Kimaro 

Na Fidelis Butahe, Mwananchi

Posted  Septemba7  2013  saa 8:54 AM

Kwa ufupi

Ni kile kilichoenda kushirikiana na vikosi vya nchi za maziwa makuu kwa msaada wa Umoja wa Mataifa.

Dar es Salaam. Jeshi la Ulinzi la Wananchi wa Tanzania, (JWTZ) limeeleza kuwa Tanzania haikupeleka kikosi cha jeshi hilo kwenye Kikosi cha Kulinda Amani cha Umoja wa Mataifa katika Jamhuri ya Kidemokrasia ya Congo (DRC)(Monusco) kwa ajili ya kupigana na Rwanda, bali kusaidia kulinda amani.

Ufafanuzi huo umekuja siku mbili baada ya Rais Jakaya Kikwete kukutana na Rais Paul Kagame wa Rwanda, kufuatia baadhi vyombo vya habari vikiandika habari jinsi JWTZ kilivyopambana na waasi wa Kikosi cha M23 na kukisambaratisha, sambamba na malumbano kati ya Tanzania na Rwanda.

Askari wa Tanzania na wale wa Afrika Kusini wako DRC kwa kazi ya kulinda amani. Malawi bado haijapeleka majeshi yake.

Akizungumza na waandishi wa habari jana, msemaji wa JWTZ, Meja Erick Komba alisema,“Kikosi cha Tanzania kilichopo DRC ni sehemu ya Kikosi cha Jumuiya ya Maendeleo ya Nchi za Kusini mwa Afrika (SADC), kilichotoa mchango wake katika Jeshi la Umoja wa Mataifa (Monusco) na kinafanya kazi chini ya komandi ya Monusco.”

Alifafanua kuwa kazi ya kikosi hicho ni kuzuia waasi kujitanua, kuvunja nguvu yao pamoja na kuwapokonya silaha, huku akisisitiza kuwa sio kweli kuwa Tanzania ilikuwa ikipigana na Rwanda au waasi wa M23, kama ambavyo imekuwa ikielezwa.

“Ridhaa ya kikosi chetu kwenda DRC ilikubaliwa pia na Rwanda, nchi ambayo ni mwanachama wa nchi za maziwa makuu. Aidha Rwanda imesaidia kuruhusu kikosi cha Tanzania kupitisha watu,vifaa na zana nchini kupitia nchi hiyo kwenda DRC,” alisema.

Alisema kuwa vikosi hivyo ambavyo mbali na Waasi wa M23 pia vimekuwa vikipambana na vikosi vya Waasi vya ADF na FDLR, kwamba bado vinaendelea kulinda amani nchini DRC na kama kunaibuka mapambano navyo hulazimika kujibu mapigo.

Kikosi cha Munusco kilianza kupambana na waasi, Agosti 27, mwaka huu na askari wa JWTZ, Khatibu Mshindo alikuwa miongoni mwa waliouawa kwa kupigwa bomu na M23 Mjini Goma ulioko Mashariki mwa DRC. baada ya kuzuka mapigano makali.

source: Mwananchi