Waliokutwa na maiti yenye mihadarati wapata dhamana

Huku vita dhidi ya dawa za kulevya ikipamba moto, wanaojihusisha na biashara hii haramu wanazidi kubuni njia za kuficha shehena zao, ikiwemo kutumia miili kusafirisha mihadarati. PICHA | MAKTABA 

Na Bakari Kiango, Mwananchi

Posted  Jumatano,Oktoba9  2013  saa 15:45 PM

Kwa ufupi

Tukio hilo lilitokea Septemba 22 mwaka huu jioni  maeneo ya Tabata ambapo maiti huyo aliyejulikana kwa jina la Rajabu Kidunda (43) alikutwa   amefariki dunia katika mazingira ya kutatanisha akiwa amelala kwenye godoro liliotandikwa sebuleni nyumbani kwa watuhumiwa hao. 

Dar es salaam. Polisi Kitengo cha Kudhibiti Dawa za Kulevya juzi limewaachia kwa dhamana watuhumiwa wawili wanaodaiwa kukutwa na maiti iliyokuwa na dawa tumboni zinazodhaniwa ni za kulevya.  

Mkuu wa Kitengo hicho,  Kamanda wa Polisi  Godfrey Nzowa,  aliliambia gazeti hili jana kuwa  katika upelelezi wao wameshindwa kuwabaini moja kwa moja watuhumiwa hao kama wanahusika na tukio hilo au la.

“Watuhumiwa hawa wapo nje kwa dhamana  na kwamba kama upelelezi wetu ukikamilika watu hawa wakakutwa na hatia basi watafikishwa mahakamani,” alisema Kamanda Nzowa.

Tukio hilo lilitokea Septemba 22 mwaka huu jioni  maeneo ya Tabata ambapo maiti huyo aliyejulikana kwa jina la Rajabu Kidunda (43) alikutwa   amefariki dunia katika mazingira ya kutatanisha akiwa amelala kwenye godoro liliotandikwa sebuleni nyumbani kwa watuhumiwa hao.   

Inadaiwa kuwa, Kidunda alifika kwenye nyumba hiyo akiwa mgonjwa akitokea  wilayani Newala mkoani Mtwara alikokwenda kuchukuliwa na watuhumiwa hao kisha kuletwa Dar es Salaam.

Baada ya kupata taarifa hizo za  kifo hicho cha utata makachero wa polisi walimchukua maiti huyo na kumfanyia uchunguzi katika Hospitali ya Taifa ya Muhimbili (MHN) ambapo aligundulika kuwa na pipi 33 aina za Heroin zenye uzito wa gramu 561.

Kwa mujibu wa Kamanda Nzowa, taarifa za awali  zilizothibishwa na Mganga Mkuu kutoka katika moja  Hospitali wilayani Newala,  zinaeleza kuwa baada ya kupata ahueni Kidunda alichukuliwa na watuhumiwa ambao mmoja kati yao anadaiwa kuwa ni mkewe.

Aliongeza kuwa, watuhumiwa hao wamepewa masharti ya kuripoti kwenye kituo cha polisi husika kwa muda waliopangiwa huku polisi wakiendelea kufanya upelelezi ikiwamo kubaini marehemu  alikozitoa dawa hizo.

SOURCE: MWANANCHI