|
Mwanamke pekee msaidizi wa waziri
Ni
asubuhi na mapema siku ya Jumatano napata wazo la kuonana na Msaidizi
wa Waziri wa Maendeleo ya Jamii, Jinsia na Watoto, Teodensia Mbunda.
Sababu ya kutaka kuonana na mwanamke huyo ni baada ya kupata habari kuwa
ndiye mwanamke pekee aliye msaidizi wa waziri katika Baraza la Mawaziri
kwa zaidi ya miaka saba.
Nashawishika
kujua ni kwanini awe mmoja katika sekta hiyo na si wengi kama ilivyo
katika sekta au idara nyingine za Serikali, je, ina maana wanawake
hawezi kufanya kazi hiyo?
Napiga
moyo konde natafuta namba yake, naipata kutoka kwa rafiki yake wa
karibu. Nampigia na tunapanga siku ya kuonana, tunakubaliana iwe baada
ya kwisha kwa mkutano wa 10 wa kikao cha 12 cha Bunge kwa kuwa alikuwa
Dodoma kuhudhuria mkutano huo.
Siku
inafika tuliyokubaliana, nafika Ofisi ya Wizara ya Maendeleo ya Jamii,
Jinsia na Watoto. Hapo nakutana na watu wengi tena wa kawaida, wengi wao
ni wale walio na kipato cha chini kabisa - wanawake kwa watoto ndiyo
wengi - wakisubiri kumuona waziri ili kutoa shida mbalimbali
zinazowakabili.
Haraka
haraka natambua wizara hii ni mtambuka ni wizara kiunganishi cha jamii
na Serikali. Kosa moja litakalofanywa na wizara hii ni sawa na
kuliangamiza Taifa la kesho kwani ndiyo inayoshughulika na maendeleo ya
jamii.
Pia
ndiyo inayoshughulikia na matatizo ya kawaida ya jamii, hususan watoto
wa mitaani, watu wenye shida mbalimbali za kifamilia, wagonjwa na mambo
mengine ya kijamii.
Katika
ofisi anatokea mama wa makamo na kuniuliza shida yangu, nami bila ajizi
najieleza na kujibiwa kuwa nisubiri kwa kuwa mhusika ninayemtafuta yuko
kwa waziri.
Mara
mlango wa Ofisi ya Waziri Sophia Simba unafunguliwa, anatoka mwanamke
mwenye umbo la wastani, kwa akili ya haraka haraka, natambua kuwa ndiye
mhusika ninayemtafuta. Namfuata na kujitambulisha kwake naye ananipokea
kwa furaha tunaingia ofisini baada ya utambulisho huo na tunaanza
mahojiano.
Mbunda
ni mwanamke mcheshi, mchangamfu na, mwenye huruma kwa wageni wake,
anaanza kunieleza kazi katika majukumu yake kama msadizi wa waziri.
Anasema kuwa unapozungumzia ufanisi mzuri katika wizara yoyote, basi utakuwa hujatenda haki kama usipomtaja katibu wa waziri.
Anasema
kazi ya katibu wa waziri ni kuwa kiungo kati ya wizara na viongozi wa
idara mbalimbali za wizara wakiwamo Naibu Waziri, Katibu Mkuu na Naibu
Katibu, wakurugenzi na watu wanaotaka kumuona waziri.
Ameitaja
kazi nyingine kuwa ni kumshauri waziri katika mambo mbalimbali ya
kisheria na utekelezaji wa mambo yaliyopangwa na wizara.
“Unajua
kuwa nafasi ya uwaziri ni nafasi ya kisiasa, si kila kitu waziri anajua
kuhusu sera na sheria, hivyo mimi kazi yangu ni kuhakikisha kuwa
namshauri waziri kuhusu hilo. Kuna kazi na sera zinazotakiwa
kutekelezwa na pia kumkumbusha waziri mambo mbalimbali muhimu yahusuyo
wizara,” amesema.
Amesema
kazi nyingine ni kupanga na kuratibu ratiba ya waziri pia kuchukua
maelezo ya wageni katika vikao vinavyofanywa na waziri, wageni wote
wanaingia katika ofisi ya wizara kwa nia ya kumuona waziri, nayo pia ni
miongoni mwa kazi zake kupanga jinsi ya mtu anavyoweza kumuona waziri au
kiongozi mwingine hapo wizarani.
Anaitaja
kazi nyingine kuwa ni kukusanya majibu yanayoulizwa na wabunge kutoka
katika mashirika na idara mbalimbali za Serikali na zisizo za Serikali.
“Kazi
nyingine ni kusikiliza shida za wageni wote bila kujali ukwasi wao,
mfano hapa katika wizara yetu kuna wageni wengi kama unavyoona, kuna
watoto wa mitaani, kuna wanawake, wote wanakuja hapa tunawasikiliza na
kuwasaidia, kuna wakati inakubidi kutoa fedha yako mfukoni kwa ajili ya
kuwasaidia.
“Nakumbuka
mwaka jana kuna mama alikuja hapa akiwa anaugua ugonjwa wa saratani
ukimuona unaogopa, akaniambia kuwa alifikia kwa ndugu zake Mabibo.
“Nia
yake ni kupata msaada wa nauli ili arudi kwao Shinyanga kwa kuwa
alipofikia sasa wameanza kumtenga. Kwa kuwa wizara haina bajeti kwa
ajili ya watu hao ilinilazimu kutoa fedha yangu mfukoni ili aondoke,
nikampa shilingi laki moja,” amesema.
Amesema kuwa watu wanaofika hapo wanaanzia kwake na kuelezea shida zao na yeye hupima uzito wa shida hizo na kutoa uamuzi.
Aliipataje kazi hiyo
Mbunda
anasema alipata kazi hiyo baada katibu aliyekuwa anafanya kazi hiyo
kuhamishiwa katika idara nyingine, hivyo waziri mwenye dhamana ya wizara
hiyo, Sophia Simba, alimwomba amsaidie kufanya kazi hiyo.
Amesema
kuwa kwa mara ya kwanza alikwenda na Waziri Simba katika mkutano wa
nchi za Afrika uliohusu ukatili wa mtoto wa kike na kufanyika, Addis
Ababa, Ethiopia.
Anasema
baada ya kurudi kutoka katika mkutano huo aliandika taarifa
iliyompendeza Simba, hivyo alimwomba aendelee kufanya kazi hiyo.
Aliendelea kufanya kazi na Simba kwa muda mrefu na hatimaye alimtaka
aandike barua ili kuomba kujaza nafasi hiyo.
“Aliniomba
niandike barua ili kujaza nafasi ya kazi hiyo, nilifanya hivyo na
nikaidhinishwa rasmi kuwa msaidizi wa waziri. Tangu siku hiyo nimekuwa
msaidizi wa Simba na tumekuwa tunahama naye.
“Nilihama naye Ikulu nikakaa naye miaka mitatu na sasa niko naye hapa watu wanashangaa kuona tunavyofanya kazi,” amesema Mbunda.
Majukumu ya Wizara
Amesema
majukumu ya Wizara ya Maendeleo ya Jamii, Jinsia na Watoto ni kuandaa
sera za wizara, kuzisimamia, kuziratibu na kutathmini utekelezaji wake.
Kueneza
na kuendeleza dhana ya maendeleo ya jamii kwa kuwashirikisha wananchi
wote, kutayarisha mikakati na mifumo ya utekelezaji ili kuchochea
maendeleo ya jamii.
Kuwajengea
uwezo wanawake na wanaume ili waweze kushiriki katika ngazi zote za
utekelezaji wa miradi na mipango mbalimbali ya maendeleo na kufaidika
sawa katika maendeleo hayo.
Amesema
majukumu mengine ni kuendeleza, kuhamasisha na kuwezesha jamii,
kuwapatia watoto haki ya kuishi, kuendelezwa, kulindwa, kutobaguliwa na
kushiriki katika maendeleo ya Taifa, pia kuratibu shughuli za mashirika
yasiyo ya kiserikali na kuyawezesha kufanya kazi kwa uwazi na ufanisi
zaidi.
Kusimamia
utendaji kazi wizarani kwa misingi ya uadilifu, haki na utawala bora na
kusimamia utoaji wa mafunzo ya taaluma ya Maendeleo ya Jamii katika
Vyuo vya Maendeleo ya Jamii na mafunzo ya maarifa, ujuzi na stadi katika
Vyuo vya Maendeleo ya Wananchi.
Anayataja
majukumu mengine kuwa kusimamia na kutekeleza majukumu hayo, wizara
inaongozwa na Dira ya Taifa ya Maendeleo 2025, Mkakati wa Kukuza Uchumi
na Kupunguza Umaskini (MKUKUTA II) na Malengo ya Milenia.
Mbunda
amesema kuwa kutokana na utekelezaji wa majukumu hayo, wizara
imefanikisha kupunguza ndoa za utotoni kwa kiasi kikubwa, ukatili wa
mtoto wa kike nao umepungua kwa kiasi kikubwa.
Matatizo
Mbunda
amesema kila kazi ina ugumu wake, lakini kazi hiyo ni ngumu kuliko kazi
nyingine. Ugumu wa kazi hiyo ni kuwa inamhusisha mtu na mtu na si mtu
na taasisi au idara.
“Unajua
kuwa mimi nashughulika na mtu si idara au sekta Fulani, kama ukiwa na
dawati lako unaweza kusema nimefunga kazi nitafanya kesho, huo ndiyo
ugumu.
“Lakini
msaidizi wa waziri unashughulika na waziri, yeye ndiyo mwenye ratiba
yako, akiondoka na wewe ndiyo muda wa kuondoka tofauti kama ungekuwa
mkuu wa kitengo au idara fulani, uvumilivu ni kitu cha muhimu unapofanya
kazi na mkuu wako ambaye ni waziri,” amesema.
Amsema tatizo jingine ni lawama kutoka kwa wafanyakazi wenzake.
“Kuna
lawama nyingi, kwa mfano, ikionekana kuwa kuna tatizo katika wizara na
tatizo hilo linafanywa kuwa siri, ili waziri asijue lakini baada ya muda
akajua basi wafanyakazi wote wa wizara wataelekeza macho yote kwako
kuwa ndiyo uliyemwambia. Hilo ni tatizo kwetu sisi makatibu wa
mawaziri,” amesema Mbunda.
Mbunda
amevipongeza vyombo vya habari kwa kuibua matatizo ya Watanzania, hali
inayoifanya wizara hiyo kufanya kazi kwa urahisi. Amesema si kazi rahisi
kwa wizara hiyo kuwafikia watu wote kwa wakati mmoja, lakini vyombo vya
habari vimefanya kazi nzuri.
“Sasa
ona kama hapa kuna habari inayoeleza mtoto wa miaka saba kuwalea watoto
wenzake, nimeisoma habari hii na kufuatilia lakini tumebaini watoto
hawa wana baba yao lakini anashikiliwa kwa kosa la kujifanya
mwanasheria. Alipofikishwa mahakamani kwa ajili ya kumtetea mshtakiwa
alishindwa kujieleza hivyo hakimu alimwamuru kuwekwa ndani.
“Hivyo
yuko ndani na kawaacha watoto wakiwa hawana mbele wala nyuma,
tumewasiliana na ndugu zao na kupata ufumbuzi, hii kama si vyombo vya
habari nani angejua haya?” amesema Mbunda.
Mbunda
anatoa wito kwa mawaziri wengine kuiga mfano wa Waziri Sophia Simba kwa
kuajiri wasaidizi wanawake, ili kuondoa dhana iliyojengeka kuwa
wanawake wakifanya kazi pamoja maendeleo huwa duni.
“Kuna
dhana imejengeka miongoni mwa wanawake wenzangu kuwa wanawake wakifanya
kazi pamoja, maendeleo huwa duni kutokana na kutopendana, lakini sisi
hakuna hilo, tumekaa kwa miaka zaidi ya saba, tunapendana na kazi zetu
zinafanyika vizuri mno,” anamalizia Mbunda.
SOURCE: JAMHURI MEDIA
| 