Kwa ufupi
Mtumishi huyu hajui kwamba katika maisha mtu
anakuwa na malengo yake, ambayo angependa yatimie na anaweka mikakati ya
kuhakikisha yanatimia. Kufanya kazi ya kuajiriwa siyo lengo ila ni
mkakati wa kutimiza lengo.
Ni miaka mingi imepita, lakini bado nakumbuka
jinsi wenzangu wengine niliokuwa nao sekondari walivyopotoshwa na watu
wanaojiita watumishi wa Mungu. Mtumishi alikuja akawapa rafiki zangu
wengine mawazo kwamba kumtumikia Mungu ni kusali na kuomba tu.
Inasikitisha kwani walikuwapo wenye akili zao,
ambao hakika kila mtu aliwaweka kwenye orodha ya watu watakaosonga mbele
kwenye masomo yao, lakini walikataa kabisa bidii ya kusoma na kuamua
kumwomba Mungu tu.
Sijui pengine ulikuwa ni utoto au vipi.
Hatukuwauliza mbona akina Nabii Danieli Mungu aliwapitisha kwenye elimu
walizozipata au wainjilisti kama Luka walikuwa wasomi wakubwa.
Ninachokumbuka ni kwamba wengi wao walipata
matokeo mabaya kwenye mitihani. Waliopata matokeo mazuri ni wale
walioweza kugawa muda wao katika kuomba na kusoma.
Pamoja na kwamba unaweza kusema walijitakia
wenyewe kwa wale waliofanya vibaya katika mitihani yao, bado mimi
namlaumu mtumishi kwa kuwaongoza vibaya, hasa ikizingatiwa kwamba
walikuwa bado kwenye umri mdogo uliohitaji mwongozo thabiti.
Kwa kuwa lengo kuu la Mtumishi wa Mungu ni
kuzifikisha roho zetu salama kwa Muumba wetu, naamini hata mtumishi yule
alikuwa na nia hiyo hiyo, ila ufahamu wake wa mambo mengine ya kidunia
ndiyo ulikuwa mdogo. Ni bahati mbaya sana kwamba mpaka leo wapo
watumishi wenye ufahamu mdogo katika maisha ya kawaida kiasi kwamba
wanakuwa wapotoshaji na wanaleta majanga kwenye jamii.
Tunapambana na watumishi wanaoshangaa kitu ambacho
hakika ni cha kawaida na kina maelezo, lakini kwa kuwa ufahamu wao ni
mdogo kuhusu mambo yahusuyo miili yetu, chakula tukilacho, viumbe
vilivyoumbwa na Mungu, matatizo ya kisaikolojia ya wanadamu, basi
wanashindwa kutoa huduma ipasavyo.
Tuna mifano mingi ya majanga yanayoletwa na
umbumbumbu wa watumishi kama hao. Nilimsikia mtumishi akihubiri kwenye
msiba mmoja kwamba mtu kuandika barua ya kuacha kazi ni sawa na kutamka
kwamba utakufa.
Kwake yeye anasema yeye hawezi kusema atakufa
kwani hilo ni kumwandikia Mungu barua ya kuchukua uhai wako wakati wapo
wale ambao watakutwa hai siku ya mwisho na huenda na yeye akawa mmoja
wao. Hilo la imani ya kufa au kutokufa namwachia mwenyewe, lakini hili
la kuandika barua ya kuacha kazi sitamwachia mtumishi huyo.
Mtumishi huyu hajui kwamba katika maisha mtu
anakuwa na malengo yake, ambayo angependa yatimie na anaweka mikakati ya
kuhakikisha yanatimia. Kufanya kazi ya kuajiriwa siyo lengo ila ni
mkakati wa kutimiza lengo.
Kama mtu anaona ana mkakati mwingine ambao ni
halali mbele ya Mungu na wanadamu ambao ana uhakika utatimiza lengo lake
kwa ufanisi zaidi kwa nini asiache kazi na kuuchukua huo mkakati
mwingine kama wa kwenda kwenye kazi nyingine ya ajira au kujiajiri?
Hakika mtumishi huyu nilimwona kuwa ni kipofu kwa
masuala ya kimaisha ambayo naye ni sehemu. Nahofia sana ustawi wa vijana
waumini wa kanisa kama hilo. Hapa karibuni nimeona kwenye vyombo vya
habari kijana wa Kitanzania akipewa tuzo na taasisi moja nchini kwa
ubunifu wake na namna ambavyo ameutumia ubunifu huo kumfanya milionea.
SOURCE: MWANANCHI
Sasa kwa matamshi ya mtumishi huyo akitokea kijana wa namna hiyo
kwenye kanisa lake, lakini yupo kwenye ajira hatathubutu kuchukua hatua
ya kuacha kazi na kutumia vipaji vyake hivyo? Mtumishi anapaswa kujua
zaidi kuhusu fursa zilizopo sasa kwa vijana. Cha ajabu naye pia ni
kijana, lakini hana habari na fursa za vijana leo.
Wakati mwingine kutofahamu huko kwa watumishi
kunazalisha mawazo potofu ya kurogwa au kutupiwa mapepo kwenye vichwa
vya watu wakati tatizo linaelezeka na lina sababu ya kutokea.
Kuna mkasa ambao mtoto wa kike aliyekuwa
akijisikia kizunguzungu, mwili wake ukapauka, akawa anapata homa za mara
kwa mara. Watumishi wakaingia kazini wakidai Roho wa Bwana amewaonyesha
kwamba kuna mapepo yananyonya damu ya binti huyo. Hivyo ikawa ‘Kwa jina
la Yesu toka, toka’ lakini mapepo yasitoke” mpaka hapo wenye ufahamu
walipoamua kumpeleka binti huyo kwa daktari akampime ili isije ikawa ni
tatizo linaloelezeka.
Binti alipopimwa ikajulikana kuwa siyo pepo bali
ni mjamzito. Watumishi wakayeyuka! Hii ni aibu kwa mtumishi. Kwa nini
kwa hali kama hiyo mtumishi akimbilie kwenye mapepo?
Kwa nini Watumishi wengi wa sasa wanaamini kila
kitu ni kurogwa? Kwa nini hawataki hata kuamini kwamba wakati mwingine
Mungu huruhusu mambo kama ilivyokuwa kwa Ayubu? Hivi ni mtumishi gani
angemwombea Ayubu wa kwenye Biblia akapona wakati ule? Inawezekana kuna
utapeli pia, lakini katika hilo namwachia yeye Yule, wanaodhihaki aseme
nao mwenyewe, mimi nipo na hao mbumbumbu tu.
Tunapata watumishi vipofu kwa sababu wengine
wanafikiria utumishi wa Mungu unahitaji watu watupu. Hivi kweli mtu hata
kusoma na kuandika ni shida kwake atayapataje yale yaliyoandikwa kwenye
vitabu vitakatifu? Mtu atakuambia Roho Mtakatifu atamfundisha. Kama huo
ndiyo mpango wa Mungu mbona Roho Mtakatifu huyo huyo alipita kwenye
vinywa vya manabii na kusema; “Mkamate sana elimu, usimwache aende zake;
Mshike, maana yeye ni uzima wako”.
Jamani watumishi wa Mungu kuweni na kiu ya kujua
yale ya Mungu na ya dunia yake ili muweze kutoa huduma stahiki. Mtoto
mwenye tumbo kubwa la utapiamlo kwa kukosa lishe bora hana haja ya
kuondolewa mapepo, badala yake ni kumwambia mama yake aache kuja
kanisani kwako akiwa amevaa vitenge vya gharama ili aweze kupata fedha
ya kumnunulia mtoto wake chakula chenye virutubisho vinavyotakiwa.
Haya yanawezekana kama tu naye mtumishi atakuwa
ameelimika. Naamini kila mtumishi wa Mungu akiwa ameelimika tutapunguza
majanga mengi ya kijamii kwani watu wanawaamini wao zaidi kuliko hata
viongozi wa kisiasa.
Asante na Jumapili Njema.
SOURCE: MWANANCHI
