Posted Jumatano,Septemba4 2013 saa 20:51 PM
Kwa ufupi
- Tumewahi kusema katika safu hii kwamba mmoja wa majaji waadilifu wanaochukia rushwa kwa dhati kabisa ni Jaji Kiongozi, Fakihi Jundu.
Mahakama Kuu imewakingia kifua majaji na
mahakimu dhidi ya tuhuma kwamba baadhi yao wamekuwa wakiwaachia au kutoa
dhamana kwa watuhumiwa wa dawa za kulevya kinyume cha sheria na
kusababisha watoroke. Jaji Kiongozi, Fakihi Jundu amesema Mahakama
haipaswi kubebeshwa lawama katika suala hilo, bali Ofisi ya Mkurugenzi
wa Mashtaka (DPP), ambayo amesema imekuwa haitimizi masharti ya kisheria
wanapofungua kesi mahakamani.
Kauli hiyo ya Jaji Jundu ni nzito na imekuja baada
ya gazeti moja hapa nchini kuchapisha habari iliyotaja majina ya baadhi
ya mahakimu na majaji iliyodai kwamba wamekuwa wakiwalinda washtakiwa
wa dawa za kulevya. Uzito wa kauli hiyo hasa unatokana na kitendo chake
cha kuelekeza lawama hizo kwa mhimili mwingine wa dola, yaani Serikali
kupitia Ofisi ya DPP.
Shutuma na tuhuma hizo dhidi ya Mahakama
zimekuwapo kwa muda mrefu, ingawa hakuna chombo cha habari kilichowahi
kuweka hadharani majina ya mahakimu na majaji na kuwatuhumu kupokea
rushwa na kuwaachia au kutoa dhamana kwa watuhumiwa wa dawa za kulevya
kinyume cha sheria.
Pamoja na kwamba Mahakama imekuwa ikitajwa kuwa
moja ya taasisi ambazo zinanuka rushwa, ukweli ni kwamba baadhi ya
mahakimu na majaji wamekuwa na rekodi ya uadilifu na utumishi
uliotukuka. Tumewahi kusema katika safu hii kwamba mmoja wa majaji
waadilifu wanaochukia rushwa kwa dhati kabisa ni Jaji Kiongozi, Fakihi
Jundu.
Hivyo ni rahisi kumwelewa Jaji Jundu pale
anapotaharuki na kufadhaishwa na hatua ya gazeti hilo ya kuituhumu
Mahakama kwa kuzorotesha vita dhidi ya biashara ya dawa za kulevya. Pia
tunamwelewa pale fadhaa hiyo inapomtuma kufikiria kulipeleka gazeti hilo
mahakamani ili litoe ushahidi wa tuhuma hizo.
Hata hivyo, tungependa kumshauri Jaji Jundu na
Mahakama kwa jumla kwamba haitapata manufaa au tija yoyote kupambana na
mtoa tuhuma badala ya kujielekeza kwanza katika kuchunguza tuhuma
zenyewe. Yafaa ieleweke kwamba uadilifu na unyofu wa Jaji Jundu na
baadhi ya mahakimu na majaji hauwezi kamwe kuwa kielelezo kwamba
mahakimu na majaji wote ni waadilifu na wanyofu.
Itakumbukwa kwamba shutuma hizo dhidi ya Mahakama
zilichangiwa na matukio mengi ya kulundikana mahakamani kwa miaka mingi
kesi za dawa za kulevya bila kutolewa uamuzi. Kesi nyingine zilikuwa
zinaisha kimyakimya tu. Tukio la hivi karibuni ambapo raia wawili wa
Pakistan waliokuwa wakikabiliwa na kesi ya dawa za kulevya walitoroka
baada ya kupewa dhamana na jaji mmoja wa Mahakama Kuu, kinyume na Sheria
Na. 9 ya mwaka 1995.
Ni kweli alivyosema Jaji Jundu kwamba sheria
hiyohiyo, katika kifungu Na. 27 (1) (b) kinamtaka DPP kuambatanisha
katika hati ya mashtaka kiapo kinachoonyesha thamani halisi ya dawa za
kulevya alizokamatwa nazo mshtakiwa. Lakini hata kama DPP hakufanya
hivyo kwa makusudi au bahati mbaya, kwa nini Mahakama zisiwe na uzalendo
na utaratibu wa kisheria wa kumrudishia DPP hati hiyo ili kasoro
zilizojitokeza zifanyiwe marekebisho kama tunavyoshuhudia Bunge
likirudisha serikalini miswada iliyowasilishwa pasipo kuwa na vichwa
wala miguu?
Yapo madai kuwa, kwa sababu ya rushwa Ofisi ya DPP
kwa makusudi inapeleka mahakamani hati za mashtaka zenye makosa. Hata
hivyo, tunadhani uovu katika vyombo vya dola utaisha baada ya ujio wa
Katiba Mpya.
source: Mwananchi
source: Mwananchi
