Posted Jumanne,Septemba3 2013 saa 21:6 PM
Kwa ufupi
Tutakuwa hatukosei hata kidogo tukisema Serikali
ndio ibebe lawama kwa kuwapo hali hiyo ya aibu na fadhaa. Utendaji na
uendeshaji wa taasisi nyeti za kitaaluma kama Ofisi ya Mwanasheria Mkuu
haupaswi kuwa wa ubabaishaji kama ule tunaoushuhudia katika ofisi nyingi
za Serikali ambapo watumishi wengi hawafanyi kazi kwa malengo na
uwajibikaji.
Ni bahati mbaya sana kwamba sasa limekuwa jambo
la kawaida kwa Bunge kuikataa miswada inayowasilishwa na Serikali
kutokana na kuwa chini ya viwango. Ni bahati mbaya pia kwamba Serikali
inaona hali hiyo kama ya kawaida. Katika hali ya kawaida tungetarajia
kwamba Serikali makini ingefadhaishwa na hali hiyo ya kudhalilika mbele
ya Bunge kila wakati.
Katika nchi nyingi duniani, muswada wa Serikali
kuondolewa bungeni kwa sababu yoyote ile ni tukio lisilo la kawaida. Ni
tukio la aibu kwa Serikali ambapo watumishi husika hulazimika
kuwajibika. Hapa nchini matukio ya aina hiyo ni mengi na tafsiri ya hali
hiyo ni kuwapo udhaifu mkubwa katika Ofisi ya Mwanasheria Mkuu wa
Serikali, ikiwa ni pamoja na wizara inayoshughulikia masuala ya sheria
na Katiba.
Hatuna chembe ya mashaka wala woga kusema hapa
kwamba kiwango cha weledi walichonacho watumishi wa Ofisi ya Mwanasheria
Mkuu wa Serikali sio tu kinatia mashaka, bali pia kinaibua maswali
mengi kutokana na nafasi yao kama washauri wa Serikali katika mambo
nyeti, ikiwa ni pamoja na kutayarisha mikataba mbalimbali. Hali hiyo
pengine inaweza kuwa mwanzo wa kupata majibu kuhusu mikataba mingi ya
Serikali ambayo imeonekana katika miaka ya karibuni kuwa mibovu na
kutokuwa na manufaa kwa taifa.
Miswada ambayo imeondolewa bungeni katika kipindi
cha miaka mitano iliyopita ni mingi kiasi cha kutufanya tupoteze hesabu
yake. Jambo la kusikitisha ni kuona Serikali ikikaa kimya pasipo
kurekebisha hali hiyo kwa kuhakikisha Ofisi ya Mwanasheria Mkuu
inaimarishwa kwa watumishi kupewa vitendea kazi stahiki na mafunzo
yanayolingana na uzito wa kazi zao. Tuliwahi kupendekeza kuwa, ajira
katika Ofisi hiyo zisitolewe kienyeji kwa sababu majukumu yake
yanahitaji watu wenye uwezo na uzoefu mkubwa katika taaluma ya sheria.
Tutakuwa hatukosei hata kidogo tukisema Serikali
ndio ibebe lawama kwa kuwapo hali hiyo ya aibu na fadhaa. Utendaji na
uendeshaji wa taasisi nyeti za kitaaluma kama Ofisi ya Mwanasheria Mkuu
haupaswi kuwa wa ubabaishaji kama ule tunaoushuhudia katika ofisi nyingi
za Serikali ambapo watumishi wengi hawafanyi kazi kwa malengo na
uwajibikaji. Dhana ya Matokeo Makubwa Sasa, kwa mfano haiwezi kuingia
katika vichwa vya watumishi hao kwa sababu inahimiza uwajibikaji, wakati
utamaduni wa watumishi wengi ni kulundika na kuzungusha mafaili mezani
asubuhi hadi jioni pasipo kuyafanyia kazi.
Tukirudi katika suala la miswada mibovu
inayopelekwa bungeni, pengine Serikali ingefanya vyema iwapo ingewaeleza
wananchi hatua ilizochukua dhidi ya watumishi wazembe ambao wamekuwa
wakisababisha miswada kuondolewa bungeni kutokana na upungufu wa
kitaaluma. Tunamheshimu sana Mwanasheria Mkuu wa Serikali, Jaji
Frederick Werema, lakini tunadhani pengine amechelewa mno kuwajibika
kutokana na miswada inayopelekwa bungeni pasipo kuwa na vichwa au miguu.
Katika Mkutano wa 12 wa Bunge unaoendelea mjini
Dodoma hivi sasa, tumeshuhudia kujirudia kwa hali hiyo ya aibu. Miswada
mitatu kati ya sita iliyopelekwa bungeni imeondolewa kutokana na sababu
kama hizo, ukiwamo muswada nyeti na muhimu wa Kura ya Maoni. Ni siri
iliyo wazi sasa kuwa, hata miswada mitatu iliyojadiliwa na kupitishwa na
Bunge ilikuwa na upungufu mkubwa, lakini Bunge hilo liliona ni busara
kufunika kombe ili mwanaharamu apite.
source: Mwananchi
source: Mwananchi
