Posted
Jumatano,Septemba18
2013
saa
24:0 AM
Kwa ufupi
Kutokana na utamaduni wa Serikali uliokuwa
umezoeleka, kwa maana ya kutoa maagizo pasipo kusimamia utekelezaji
wake, wahamiaji wengi walikaidi agizo la Serikali kwa kudhani mamlaka
husika zisingekuwa na uthubutu na dhamira ya kuwarudisha makwao.
Operesheni ya kuwakamata wahamiaji haramu
inayoendelea nchi nzima imeonyesha mafanikio makubwa mpaka sasa. Baada
ya miaka mingi ya wahamiaji hao kuishi nchini kinyume cha sheria na
kuifanya nchi yetu kuwa kama haina mwenyewe, sasa wameanza kutambua
kwamba hakika Tanzania ina wenyewe na sasa imedhamiria kuhakikisha
wageni wanaoingia nchini wanafanya hivyo kwa kufuata sheria za nchi.
Kwa hali yoyote ile, Serikali za awamu zote
zilizotangulia zinastahili lawama kwa kulea tatizo hilo la wahamiaji
haramu. Tatizo hilo halikuanza leo wala jana, bali lilianza baada ya
nchi yetu kupata uhuru mwaka 1961, ambapo sera nzuri ya Serikali ya
kuwaona Waafrika wote kama ndugu ilipotoshwa ama ilitafsiriwa vibaya na
baadhi ya Waafrika wenzetu, hivyo kuingia nchini kutoka kila pembe ya
Afrika pasipo kufuata taratibu. Matokeo yake ni usalama wa taifa kuwekwa
rehani kwa kuachia mipaka yetu kuvuja kirahisi kwa namna ambayo ni
vigumu kuielezea.
Matokeo yake ni Watanzania wenzetu wanaoishi
katika mikoa ya mipakani kulazimishwa kuishi kama mateka au wakimbizi
katika nchi yao. Wahamiaji hao haramu pamoja na wengine wengi walioitwa
wakimbizi kutokana na vita ya wenyewe kwa wenyewe katika nchi zao,
waliifanya Tanzania kama kimbilio pekee katika pembe hii ya dunia. Muda
si mrefu tulianza kushuhudia kuzorota kwa hali ya usalama kutokana na
kushamiri kwa vitendo vya uhalifu kama mauaji, utekaji wa magari na
kuzagaa kwa silaha za kila aina. Uharibifu wa mazingira na vyanzo vya
maji uliongezeka kwa kasi ya kutisha na kuleta njaa na hata kusababisha
baadhi ya watu kupoteza maisha.
Ni jambo la kupongeza kwamba agizo la Rais Jakaya
Kikwete limetekelezwa kwa ufanisi mkubwa, aliposema wahamiaji haramu
warudi makwao kwa hiari, vinginevyo ifanywe operesheni maalumu ya
kuwarudisha makwao kwa nguvu. Ni kweli wakimbizi wapatao 14,000 walirudi
makwao kwa hiari, lakini wenzao wengi walikaidi agizo hilo na kujibana
kwa wenyeji na sehemu nyingine, yakiwamo mapori.
Kutokana na utamaduni wa Serikali uliokuwa
umezoeleka, kwa maana ya kutoa maagizo pasipo kusimamia utekelezaji
wake, wahamiaji wengi walikaidi agizo la Serikali kwa kudhani mamlaka
husika zisingekuwa na uthubutu na dhamira ya kuwarudisha makwao. Hivyo,
operesheni hiyo ilipoanza walitaharuki na kukumbwa na hali ya
sintofahamu, huku wakitapatapa mithili ya mtu anayekumbuka shuka kukiwa
tayari kumekucha.
Ndio maana kimbunga cha operesheni hiyo
inayoendelea kwa kasi hivi sasa kimewanasa wahamiaji wengi wa kila aina.
Taarifa zinasema wamenaswa wachungaji, walimu, wafanyabiashara na
wafanyakazi wengi kutoka nchi mbalimbali barani Afrika waliokuwa katika
ajira mbalimbali kinyume cha sheria, ikiwa ni pamoja na walioajiriwa
katika sehemu nyeti kama Uwanja wa Ndege wa Mwalimu Julius Nyerere wa
Dar es Salaam, maofisini na viwandani. Operesheni hiyo pia imewatia
mbaroni Watanzania waliokamatwa wakiwa wamewaficha majumbani mwao
wahamiaji hao haramu.
Pamoja na kuipongeza Serikali kwa kuendesha
operesheni hiyo kwa ufanisi mkubwa, tungependa kuitahadharisha kwamba
wahamiaji haramu hawatoki nchi za Afrika pekee, bali pia nchi za Bara la
Asia, zikiwamo China, India, Pakistan na nyinginezo. Tunatahadhalisha
pia kwamba operesheni hiyo ifanywe kwa uadilifu, busara na hekima bila
kuendekeza vitendo vya rushwa, ubaguzi na ukiukaji wa haki za binadamu.
SOURCE: MWANACHI
SOURCE: MWANACHI
