Mkurugenzi Mtendaji wa Mwananchi Communications Ltd, (MCL) Tido Mhando
akizungumza na waandishi wa habari jana jijini Dar es Salaam kuelezea
shindano la ‘Chomoka na Mwananchi’ ambapo wateja wa gazeti hili
watajishindia magari matatu mapya na Sh1 milioni kila siku kwa siku 100.
Picha na Salhim Shao.
Kwa ufupi
Ni kupitia promosheni kamambe ya Gazeti la Mwananchi itakayodumu kwa siku 100 kuanzia leo.
Dar es Salaam. Kampuni ya Mwananchi
Communications Limited (MCL), imezindua promosheni kabambe ya ‘Chomoka
na Mwananchi’ itakayowawezesha wasomaji wa gazeti la Mwananchi,
kujishindia zawadi zenye thamani ya Sh250,000,000.
Zawadi hizo ni pamoja na fedha taslimu na magari matatu mapya.
Akizungumza katika uzinduzi huo jana, Mkurugenzi
Mtendaji wa MCL, Tido Mhando, alisema promosheni hiyo itakayoanza leo,
itafanyika nchini kote kwa siku 100 na kila siku kutakuwa na mshindi
ambaye atajinyakulia Sh1,000,000.
“Hii ni promosheni ambayo lengo lake ni
kuwashukuru wasomaji wetu kwa kuendelea kulipenda gazeti lao na kuliweka
juu hapa nchini,” alisema Mhando.
Alisema hadi mwisho wa promosheni hiyo (Novemba
30, mwaka huu), wasomaji 100 watakuwa wamejinyakulia fedha taslimu
Sh100,000,000 na wengine watatu watapata magari mapya.
“Lengo letu ni kuwawezesha wasomaji siyo tu kupata
habari na kufikiri tofauti, bali pia kuweza kuwajenga kimaisha,”
alisema Mhando.
Alisema promosheni hiyo itaendeshwa na MCL kwa kushirikiana na Kampuni ya Push Mobile.
Alitaja magari ambayo yatanyakuliwa na wasomaji kuwa ni Vista, Manza na Tata Safari.
“Haya ni magari mapya kabisa kutoka kiwandani,” alisema.
Jinsi ya kushiriki
Alisema kuwa ili kushiriki promosheni hiyo,
msomaji wa gazeti la Mwananchi, atatakiwa kujipatia nakala ya siku
husika na atakuta namba maalumu ya ushiriki ikiwa imebandikwa kwenye
jarida lililomo ndani ya gazeti hilo.
“Kila nakala ya kila gazeti kwa kila siku itakuwa
na namba maalumu ya ushiriki inayojitegemea kabisa bila kufanana na
namba nyingine, msomaji atatakiwa kutuma namba hiyo ya ushiriki kwa
ujumbe mfupi wa simu (sms) kwenda namba 15584 na hapo atakuwa ameingia
kwenye droo ya Sh1,000,000 ya siku husika na droo ya magari matatu,”
alisema.
