Posted
Jumatatu,Septemba2
2013
saa
21:31 PM
Kwa ufupi
Ndio sababu matumizi ya bastola katika vitendo
vya uhalifu katika mikoa ya Dar es Salaam, Kilimanjaro, Arusha Manyara
na mikoa inayopakana na nchi za Maziwa Makuu yamekuwa yakiongezeka.
Mwishoni mwa wiki tulichapisha habari za
uchunguzi kuhusu jinsi tatizo la rushwa katika baadhi ya vyombo vya dola
linavyowezesha watu wasio na sifa kumiliki silaha ndogondogo, hasa
bastola. Uchunguzi huo wa muda mrefu katika mikoa mbalimbali hapa
nchini, ikiwamo iliyo mipakani umeonyesha kwamba bastola zinamilikiwa na
watu pasipo kufuata taratibu na kwamba nyingi zinatumika katika vitendo
vya uhalifu.
Uchunguzi huo umebaini pasipo kuacha shaka kwamba
kuongezeka kwa vitendo vya uhalifu wa kutumia silaha pia ni matokeo ya
udhaifu wa Jeshi la Polisi nchini katika kusimamia utekelezaji wa sheria
husika. Katika uchunguzi huo, imebainika kwamba hivi sasa hata vibaka
ambao awali walikuwa wakitumia visu, nondo na mbao za misumari kupora
watu, sasa wanatumia bastola kufanya uhalifu huo.
Kama uchunguzi huo ulivyobainisha, tatizo la
kuzagaa kwa bastola ni kubwa na haliko mijini pekee, bali pia vijijini.
Wahamiaji haramu katika mikoa inayopakana na Rwanda, Burundi, Uganda na
DR Kongo wamethibitika kuingiza nchini silaha za kila aina na kuziuza
kwa bei ndogo kwa watu wanaozitumia kufanya vitendo vya uhalifu.
Uchunguzi umeonyesha kwamba moja ya njia ambazo
zimekuwa zikitumika kuwapa silaha watu wasiokuwa na sifa ni kutumia
mawakala au baadhi ya maofisa wa polisi kuwatafutia vibali vya kumiliki
silaha.
Taratibu za kuomba kumiliki silaha zinajulikana
lakini zinapindishwa kutokana na udhaifu uliomo katika sheria husika.
Waombaji wanatakiwa kujadiliwa na kuhojiwa na kamati za ulinzi na
usalama za vijiji, wilaya na mikoa na kujiridhisha kama mwombaji anazo
sifa za kumiliki silaha, kwa maana ya kutokuwa na rekodi yoyote ya
uhalifu. Hata hivyo, uchunguzi umegundua kwamba katika mikoa mingi
baadhi ya wafanyabiashara, wakiwamo vijana wadogo wana vibali vya
kumiliki bastola, ingawa hawakupitia katika mchakato huo.
Ndio sababu matumizi ya bastola katika vitendo vya
uhalifu katika mikoa ya Dar es Salaam, Kilimanjaro, Arusha Manyara na
mikoa inayopakana na nchi za Maziwa Makuu yamekuwa yakiongezeka. Vibali
vya kumiliki silaha vinapatikana kirahisi kutoka kwa baadhi ya maofisa
wa Jeshi la Polisi, Makao Makuu na baadhi ya wale waliopo mikoani kwa
Sh1.5 milioni, vyanzo vyetu vya habari vilisema kwa sharti la kutotajwa
majina gazetini kutokana na kuhofia usalama wao. Vyanzo hivyo pia
vinasema hali hiyo ndio chimbuko la ufyatuaji ovyo wa risasi katika
maeneo mengi ya starehe mijini na sehemu zinazozunguka migodi.
Ulegevu na udhaifu wa dola katika kudhibiti
matumizi na umiliki holela wa silaha umetoa mwanya kwa baadhi ya
wamiliki kukodisha silaha zao na kurudishiwa silaha hizo mara baada ya
kuzitumia katika uhalifu. Baadhi ya watu waliohojiwa kuhusu sababu za
watu kumiliki silaha kwa kutumia njia za mkato wanapinga dhana kwamba
ukiritimba katika upatikanaji wa silaha ndio sababu ya kuwapo hali hiyo.
Wananchi wengi wanaamini kwamba iwapo Serikali
itaendesha operesheni iliyotangazwa na Rais Jakaya Kikwete ya
kuwarudisha makwao wahamiaji haramu, upatikanaji wa silaha kirahisi
utapungua kwa kiasi kikubwa.
Serikali sasa inapaswa kutafuta mbinu na mikakati
ya kuendesha misako ili kukamata silaha zinazomilikiwa kinyume cha
sheria. Hii ni pamoja na kuweka udhibiti wa kutosha ili watu
wasimilikishwe silaha bila kuwa na sifa.
Source:Mwananchi
Source:Mwananchi
