Uzalendo huu wa wabunge usiwe nguvu ya soda

Posted  Jumanne,Septemba10  2013  saa 22:8 PM

Kwa ufupi

Nikirejea walichosimama kidete kutetea, Mbunge wa Kawe, Halima Mdee (Chadema), alisema ni lazima tutunge sheria zinazolinda wazawa badala ya kuweka vipengele vinavyowapendelea wawekezaji.

Wiki iliyopita tumeshuhudia mjadala mzito kuhusu Muswada wa Sheria ya Taifa ya Umwagiliaji wa mwaka 2013 uliowafanya wabunge kuungana bila kujali tofauti za kisiasa, kutetea maslahi ya nchi.

Matukio ya aina hii ni nadra kushuhudiwa katika Bunge letu katika miaka ya karibuni.

Mara nyingi tumeshuhudia baadhi ya wabunge wakiponda jambo fulani kwa sababu tu wakiliunga mkono litakipa chati chama fulani.

Nimetumia mfano wa mjadala wa muswada huo kwa siku za usoni wabunge watapata fursa ya kujadili miswada miwili muhimu katika mustakabali wa taifa letu ikiwamo wa Katiba Mpya.

Mmoja wa miswada hiyo ni ule wa Sheria ya Marekebisho ya Sheria ya Mabadiliko ya Katiba ya mwaka 2013 ambao umepita licha ya kususiwa na wabunge wa upinzani. Ule wa Kura ya Maoni uliondolewa.

Je, wabunge wetu wataweka kando tofauti zao za kisiasa na misimamo ya kichama na kujadili muswada huo kwa maslahi ya nchi kama walivyofanya katika ule wa Sheria ya Taifa ya Umwagiliaji?

Sababu ya kuhoji nitazieleza baadaye baada ya kwanza kueleza walichokifanya wabunge wakati wa kujadili muswada nilioutaja hapo juu. Hakika walionyesha uzalendo wa hali ya juu.

Kikubwa katika mjadala huo ni kwamba Bunge lilipoketi kama kamati ya Bunge zima, walioongoza kuibana serikali walikuwa ni wabunge wa Chama Cha Mapinduzi (CCM). Huu ni uzalendo. Nasema walichoonyesha wabunge ambao waliungwa mkono na upinzani hakika kilionyesha uzalendo na namna walivyojitoa kutetea maslahi ya Watanzania.

Nikirejea muswada huo, baadhi ya vifungu vilipendekeza pale ambapo eneo fulani limetamkwa ni la umwagiliaji, mtu au watu wanaomiliki eneo hilo watalipwa fidia na kuondoka.

Nikirejea walichosimama kidete kutetea, Mbunge wa Kawe, Halima Mdee (Chadema), alisema ni lazima tutunge sheria zinazolinda wazawa badala ya kuweka vipengele vinavyowapendelea wawekezaji.

Mbunge wa Viti Maalumu, Esther Bulaya (CCM), “Huu msimamo wa kuwakumbatia wageni halafu wazawa hawanufaiki tunasema sasa basi.”

Bulaya ambaye mimi ni muumini wake mkubwa alienda mbali na kudai, “Watanzania wameshindwa kunufaika na rasilimali nyingine na wamebakia na ardhi…hatukubali tena.”

Kwa maneno mengine, Bulaya alitaka kufikisha ujumbe kuwa katika maeneo ambayo kulikuwa na madini, wananchi waliondolewa ama kwa kulipwa fidia kidogo ama kutolipwa kabisa.

Hata hivyo, kubwa zaidi wananchi wa maeneo hayo hawanufaiki na uwekezaji katika migodi hiyo zaidi ya wageni kuwa ndio wanufaika wakubwa huku wananchi wanaoishi jirani wakiwa mafukara.

Ndiyo maana Mbunge wa Kisesa, Luhaga Mpina (CCM)na yule wa Peramiho, Jenister Mhagama (CCM), wakasimama kidete wakitaka sheria hiyo itamke wananchi watakaokutwa katika eneo linalotangazwa kuwa la umwagiliaji kwanza wapewe hisa na kama hataki ndipo apewe fidia ama vyote viwili.

Serikali ilikubali mapendekezo hayo na kwa mara ya kwanza katika nchi yetu, hakuna mwekezaji atakayepewa eneo la umwagiliaji ama kwa kuingia ubia na wenyeji ama kuwalipa fidia lakini na hapo hapo kuingia nao ubia.

Hakika ndiyo maana kule mwanzo nilihoji kama katika muswada huu, wabunge waliweka tofauti zao za kisiasa. Je, katika miswada hii miwili muhimu inayohusu katika mpya wataonyesha uzalendo huo?

0754 432243
SOURCE: MWANANCHI