Mkurugenzi wa Ulinzi na Usalama wa Chadema, Wilfred Lwakatare akiwa
amelazwa katika Hospitali ya Taifa ya Muhimbili, Dar es Salaam, jana,
kutokana na kusumbuliwa na maradhi ya Shingo.
Kwa ufupi
Akizungumza na mwandishi wa habari hizi kwenye wodi
ya uchunguzi ya Sewahaji, Lwakatare alisema kuwa anakabiliwa na matatizo
ya pingili za shingo na jopo la madaktari linakutana leo kuamua kama
afanyiwe upasuaji ama la.
Dar es Salaam. Mkurugenzi wa Ulinzi na Usalama
wa Chama cha Demokrasia na Maendeleo (Chadema), Wilfred Lwakatare
amelazwa katika Hospitali ya Taifa Muhimbili kutokana na matatizo ya
shingo.
Akizungumza na mwandishi wa habari hizi kwenye
wodi ya uchunguzi ya Sewahaji, Lwakatare alisema kuwa anakabiliwa na
matatizo ya pingili za shingo na jopo la madaktari linakutana leo kuamua
kama afanyiwe upasuaji ama la.
“Nilifanyiwa uchunguzi kwa x-ray na madaktari
walisema hakuna jinsi zaidi ya upasuaji na kesho (leo) jopo la madaktari
linasoma picha za x-ray kuamua aina ya upasuaji...nimegundulika
kuharibika pingili ya sita na saba.
“Nilipata ajali mwaka 2008 na nilipona, lakini
nilipatwa na kadhia hii baada ya kufikishwa Kituo Kikuu cha Polisi baada
ya kukamatwa na zaidi ni kutokana na kulala chini,” alisema Lwakatare
akiwa kitandani.
Alisema kuwa aliwahi kuumwa akiwa Gereza la Segerea alikokuwa anashikiliwa kabla ya kuachiwa kwa dhamana na kwamba alihudumiwa.
Alisema tatizo hilo lilijirudia jana asubuhi
ambapo alifikishwa hospitali hiyo na kupatiwa kitanda kabla ya kufanyiwa
vipimo vya X-ray na kukutwa tatizo hilo ambalo alisema gharama yake ni
Sh3.5 milioni.
